Mit dä Autos händ mir üs uf de Weg is Glarnerland gmacht. Nachdem mir mit chli Umweg und Parkplatzproblem im Buechholz ds Glaris acho sind, händ mir ghofft, dass üse Wettkampf so strahlend endet wie d’Sunne a dem Tag und nöd sowie üsi Hiireis.

De Wettergott häts nämli mega guet mit üs gmeint, fast zu guet, will d’Sunne hät alles geh und mit voller Chraft uf üs abgestrahlet, was nebetem Wettkampf üs ebefalls zum Schwitze bracht hät. Öb d’Schweissperle drum vom Turne oder vo de Hitz cho sind, chan niemmer so gnau sege. Mir würet aber sege, vo beidem, will mir händ bi de drü Diszipline üses beschte geh und händ üsi Fans, wo extra für üse Wettkampf agreist sind, nöd welle enttüsche.

Gstartet ih üsä Wettkampf simmer mitem Stufebarre. Mit nüem Dress, nüem Programm und under nüer Leitig händ sie ds Publikum ich ihre Bann zoge und es 8.74 turnet.

Schlag uf Schlag isches dänn ih üsem Wettkampfprogramm mitem Team Aerobic wiitergange. Das händ mir das Jahr zerst mal gmacht und händ üses Erlernte vo de letschte 5 Mönet under Bewiis gstellt und ds Publikum hoffentlich chli mit üsem iigstudierte Programm chöne verzaubere. Mit üsem erste Team Aerobic Wettkampf überhaupt sind mir meh als ds friede, mir händ sogar üsi Erwartige übertroffe und es 8.22 anezauberet.

De Abschluss vo üsem Wettkampf hät de Fachtest gmacht. Tapfer händ mir em Wind und de Hitz trotzt. Mir sind grennt und händ die Bäll gschosse und gfange wie Grossi. Das hät sich au absolut glohnt, will am Endi händ mirs sogar ufs Podestli gschafft und händ dörfe mit de Note 9.36 ufem dritte Platz stah.

Nachem wohlverdiente Znacht und Dusche isches ii de Bar zum krönende Abschluss cho, wo mir de Abig usklinge lah händ.